Hë mo se në Shqipëri jemi!
- Published in Andej-Këtej
Nga Tanush Çaushi
Kjo shprehje vulgare është bërë e rëndomtë dhe neveritëse në mjediset tona publike. E dëgjon poshtë dhe e kundërshton, por kur e dëgjon edhe lart, të nervozon e të revolton. Vërtet çudia ngrihet në grotesk e paradoks:
- Kaq poshtë bien të sipërmit tanë sa hedhin poshtë edhe të vetmen që kanë?!...
E vetmja është Shqipëria more liderucë, ndërsa ju jeni flluckë!
Votuesi i shkretë pas vote i ankohet deputetit te emëruar për një problem që ka dhe "babai i kombit" ia kthen si pa të keq duke shtrembëruar turinjtë:
- Ngadalë ore se nuk u bë kiameti, në Shqipëri jemi!
Publikohen me zë dhe figurë fakte kriminale për kimikatet vdekjeprurëse që hidhen në qumësht, mish, perime, bukë dhe nënministri qose e ministri leshtor i qeverisë, pasi mbrojnë kriminelët e heshtur, ciasin si minjtë e vrimave të zeza:
- E po ka dhe të tilla se në Shqipëri jetojmë!
Administrata e fryrë në bashki e në ministri sa s'kanë as ndenjëse ku të ulen. Burokratë të korruptuar që nuk lëvizin as prapanicën për t'i bërë qoftë edhe shërbimin më të vogël qytetarit që i mban me taksat e shumta. Besojnë dhe shkruajnë skamnoret e shkretë ne portalin e famshëm. Presin e presin derisa përgjigja zbret ngeshëm nga lart:
- Problemi i drejtë, do zgjidhet po prit se në Shqipëri jetojmë!
Na mbyt smogu, na pushtojnë plehrat, na vjedhin shitoren dhe përgjigja po ajo.
Në tv emisione ku vipat lozin lojna fëmijësh e fëmijët që në jetë bëjnë punën e tyre dhe prapë po e njëjtë përgjigja!
Grinden liderucët, shahen, akuzohen, shtrembërojne nofullat, kërcasin dhëmbët, shtojnë rrogat e shërbesat për vete e rishtas
- Hë mo se në Shqipëri jemi!
Kudo, kurdo, ngado e njëjta përgjigje sikur Shqipëria qenka lavire!
Jo o asliderucë, Shqipëria s'është lavire por Zonjë e bukuroshe mesdhetare që ju e zhvatni dhe e perlyeni. Sjellja juaj i ka bërë shqiptarët të rilexojnë rishtas skicën e Migjenit të famshëm dhe të pyesin njëlloj si ai:
- A durohet ma?... Deri kur kështu?