Toronto - RH Scholarship, organizata e të rinjve që mbështet ekselencën në eventin e saj të radhës
Të shtunën, më 3 mars, në një nga sallat e “Rizzo Banquet Hall” në Toronto, është zhvilluar eventi i radhës i RH Scholarship “Empowering the Albanian-Canadian Students to Excellence”. RH Scholarship, me bashkëthemelues Rej dhe Tea Haxhillari, është një organizatë jofitimprurëse e krijuar në vitin 2013 që ka për mision, përmes akordimit të bursave, mbështetjen dhe promovimin e ekselencës akademike në rradhët e nxënësve dhe studentëve të rinj të komunitetit shqiptaro-kanadez. Deri tani bursa kanë përfituar 30 nxënës dhe studentë me rezultate të shkëlqyera.
Aktivitetet e RH Scholarship zhvillohen dy herë në vit, në mars dhe në nëntor. Aktiviteti i fillimvitit ka për synim mbledhjen e fondeve por edhe kremtimin e 7-8 marsit, ndërsa ai i nëntorit është eventi ku shpallen studentët fitues. Përzgjedhja e fituesve bëhet mbi bazën e disa kritereve të përcaktuara më parë nga një komision në perbërje të të cilit gjenden figura të nderuara të komunitetit, por edhe të rinj profesionistë të fushave të ndryshme. Vlen të përmendet prezenca e vazhdueshme e autoriteteve politike të nivelit lokal, provincial e federal dhe e ambasadorëve të Republikës së Shqipërisë në mbështetje dhe inkurajim të iniciativës fisnike të grupit të të rinjve shqiptaro-kanadezë.
Personalitete që kanë mbështetur RH Scholarship, kanë qenë ndër vite i ndjeri Rob Ford, kryetar i Bashkisë së Torontos, ish-Ministri i qeverisë së Ontarios, Tony Ruprecht dhe deputetë të tjerë të legjislaturës provinciale, mes të cileve më aktivi mbetet Ivan Baker. Në 18 nëntor të vitit të kaluar, Kryeministri kanadez Justin Trudeau e përshëndeti gjithashtu përmes një letre zyrtare mbremjen vjetore të shpalljes së studentëve fitues, duke e vlerësuar iniciativën e RH Scholarship si “frymëzuese për gjeneratën e re të liderëve komunitarë”. Në aktivitetet e RH Scholarship nuk mungojnë asnjëherë artistët shqiptarë të kengës. Në eventin e sivjetëm të 3 marsit, të moderuar nga Tea Haxhillari dhe Magda Kajo, ishin të pranishëm për herë te dytë në Toronto, të mirënjohurit Shpëtim Saraçi dhe Mira Konçi, bashkë me të cilët interpretuan Vedat Ademi, Altin Xhepa dhe Erlind Erebara.
Ambasadori i Republikës së Shqipërisë në Kanada, Ermal Muça, përshëndeti të pranishmit dhe vlerësoi RH Scholarship për arritjet dhe shembullin që ofron ndaj brezit të ri të komunitetit shqiptaro-kanadez.
FlasShqip.ca