VJESHTA
- Published in Krijimtari
- Nga: Vangjush Ziko
Vjeshta
me kostum lara-lara
qepur me gjemba dëllinje
dhe fije merimange
veshur karnavale
me pelerinë të grisur mbretëreshe,
sikur viti të kish vetëm një stinë,
atë të ngërdheshjes.
Vjeshta,
piktorja surrealiste
më dhuroi kryeveprën e artë
pikturuar mbi një re të grisur
me furcën e shiut
ngjyer në llucën e baltës.
Vjeshta
ma mbushi gotën
me mushtin e vreshtës,
mos e ndiej vetminë,
as shi, as breshër,
as vetëtimat e dimrit
që në thinjët e mia
fshehur rrinë.