Vangjush Ziko: TEMPULLI GËLQEREBARDHË
Mos e prekni
këtë shtëpi gëlqerebardhë,
këtë shtëpi të vjetër
sa malet,
fijet e kashtës
si damarët e mallit
në llaçin e saj,
këto qoshe të gdhendura shtufi,
këta qemerë të lakuar si qafë mjelme,
këtë ëndërr gushpëllumbi në dritaret
nga gjumi mos e zgjoni,
mos e trembni bukurinë e fjetur,
oborri ku çel borziloku
kundërmon erë shenjti,
mos e prekni tempullin gëlqerebardhë
qyteti im
nuk do ketë ku të falet.