Letërsi

Këshillat e Konicës për gazetarët

Në këtë fillim rrugëtimi të Portalit FlasShqip.ca, e kemi menduar të sjellim këshillat epike të Faik Konicës drejtuar një gazetari që dëshironte të botonte një gazetë shqip në Misir. I madhi Konica ka ditur aq bukur të hyjë në thelb të psikologjisë së shqiptarëve saqë vitet nuk i venitin aspak këshillat e tij. Janë këshilla motivuese në fakt dhe aspak dekurajuese, që vlejnë të nguliten e të qarkullojnë ndër rrethet e gazetarëve të angazhuar për të përcjellë jo vetëm lajmin e ditës por edhe kultivimit të kulturës kombëtare. Ju ftojmë ti lexoni me vëmendje e të na mbështesni në këtë zgjedhje.

I dashur mik – në e bëfsh gazetën me fleta të mëdha; shqiptarët do të thonë që s’fshihet dot lehtë; në e bëfsh me fleta të vogëla, do të thonë se s’është gazetë, por libër. Në e shtypsh me letra të holla, do të thonë se s’këndohen edhe prishin sytë; në e shtypësh me letra të trasha do të thonë se je “hamall” e kërkon të mbushësh vend. Në shkrofsh toskërisht, do të thonë se s’është gazetë për gjithë shqiptarët; në shkrofsh gegnisht prap ashtu, në shkrofsh në gjuhë të përzier me të dyja, gjysëm gegnisht, gjysëm toskërisht, do të thonë se është “çervish”. Në mos shkrofsh për politikë, do të thonë se s’është koha të punojmë për letratyrë, kur vendi ndodhet në rrezik; në shkrofsh për politikë do të thonë se prishë punë duke egërsuar qeverinë. Në folsh butë për Turqinë, je i paguar prej Stambollit; në shkrofsh rreptë kundër Turqisë, kërkon të të jap Sulltani të holla që t’a pushosh gazetën. Në mos gjefsh të holla që ta mbash gazetën, do të thonë se s’je i zoti; në gjefsh të holla je intrigant a i shitur. Në folsh për plot çlirimin e Shqipërisë, do të thotë je djall e kërkon gjëra që duheshin gatitur në qind vjet më parë; në folç për nevojën të përpiqemi t’a shpëtojmë gjuhën dhe kombësinë, duke vënë vendin nën hijen e një Fuqisë së Madhe, s’qënke shqiptarë i vërtetë. Në folsh mirë për shqiptarët e krishterë, hidhërohen shqiptarët muhamedanë; në folsh mirë për muhamedanët, hidhërohen të krishterët; në folsh mirë për të krishterët e për muhamedanët që janë shqiptarë të mirë, e ligsht për të ligjt, aherë do të hidhërohen të gjithë. Aq për sot, se kam frikë mos të zërë gjumi.

Referenca: Ilir Ikonomi “Faik Konica, Jeta në Uashington” 2011 Onufri.

 

 

Tagged under Konica gazetar Këshillat