Vende & Zakone

Fotot e rralla nga Shqipëria e vitit 1921 në Muzeun Etnografik të Gjenevës - Nga Ilir Ikonomi

Ilir Ikonomi

Zvicerani Eugène Pittard dhe gruaja e tij Noëlle Roger bënë disa fotografi të rralla gjatë udhëtimit të tyre nëpër Shqipëri mes gushtit dhe tetorit 1921.

Pittard ishte një adhurues i Shqipërisë dhe i erdhi asaj në ndihmë në çaste mjaft të vështira - në Konferencën e Paqes në Paris dhe më vonë, kur Shqipëria do të pranohej në Lidhjen e Kombeve në Gjenevë, më 17 dhjetor 1920.

Në atë kohë ai ishte zëdhënës i Lidhjes.

Pittard ndihmoi edhe për organizimin e Kryqit të Kuq Shqiptar.

Gruaja e tij Noëlle Roger ishte gazetare dhe shkrimtare dhe e shoqëronte të shoqin gjatë udhëtimeve të tij antropologjike nëpër Ballkan.

Fotografitë janë të Muzeut Etnografik të Gjenevës.

Shënim i Redaksisë: Në Muzeun Etnografik të Gjenevës gjenden rreth 100,000 objekte dhe 300,000 libra e dokumente (ikonografike, fotografike, audiovizuale dhe incizime) nga pesë kontinentet, të ndarë në shtatë departamente (Afrikë, Amerikë, Azi, Evropë, Oqeani, etnomuzikologji dhe antropologji vizuale) dhe një bibliotekë të specializuar. I inauguruar më 25 shtator 1901, muzeu u themelua me iniciativën e profesor Eugène Pittard i cili gjithashtu krijoi një katedër të antropologjisë në Universitetin e Gjenevës.

1. Eugène Pittard dhe Noëlle Roger mes mikpritësve të tyre shqiptarë në Tiranë.

2. Tirana në vitin 1921. Fusha në fotografi është vendi ku pas 10 vjetësh do të ndërtohej qendra e kryeqytetit e projektuar nga arkitektët italianë, me sheshin dhe ministritë.

3. Kalaja e Petrelës.

4. Kalaja e Petrelës.

5. Pamje nga maja e Petrelës.

6. Rrapi shumëshekullor i Tiranës ose Rrapi i Tabakëve. Ekziston ende pranë Urës së Tabakëve por është tharë thuajse fare. Dikur ishte një monument madhështor dhe mbahej mend për degët e fuqishme që gati preknin tokën.

7. Xhamia e Sulejman Pashës, Tiranë. U dëmtua gjatë luftës dhe nuk u rindërtua më.

8. Noëlle Roger, djathtas, duke mbajtur shënime gjatë një ndalese në Petrelë.

9. Grumbullimi i vullnetarëve në Tiranë. Ata erdhën pas lajmeve se bandat serbe po mobilizoheshin në kufirin verior dhe pranë Lumës.

10. Leskoviku i djegur dhe i shkatërruar nga bandat greke në vitin 1914, pak kohë pasi ishin caktuar kufijtë e Shqipërisë dhe kur fuqitë e mëdha i kërkuan Greqisë të tërhiqte trupat e pushtimit. Në vitin 1921, pamja e qytetit të djegur nuk kishte ndryshuar.