Vetmi të rreme - Nga Artan Gjyzel Hasani

ka edhe ditë të bukura

që të vjen keq t’i ngrysësh

me kafe cigare dhe facebook

por s’e ke ti në dorë

dhe s’bën dot ndryshe

tashmë ke marrë plotësisht formë

në thelbin tonë të ftohtë postmodern

jemi nënprodukt kodesh dhe alfabetesh

që nganjëherë na pëlqen të dashurojmë

por fati është i shkruar

dhe ti ashtu si unë

je veç një shkronjë e klikuar

në tastierën e ditëve

ku orët humbin kohën

pa u keqkuptuar

derisa të vijë mbrëmja

kjo nënë e urtë dhe grua e askujt

dashnorja e atyre që vinë

dhe vejusha e atyre që ikën

e vetme si një shans i fundit

që në mungesë të ilaçeve

ia japim vetes para gjumit

misterioze si një vetmi e rreme…

(nga vëllimi poetik “LIBIDO” 2024)

©artangjyzelhasani