Toronto: Ceremoni masive homazhi në kujtim të 10 viktimave

Sipas një zëdhënësi të Bashkisë Toronto, evenimenti ishte apolitik dhe asnjë zyrtar shtetëror nuk mund ta merrte fjalën gjatë tij.

Mijëra qytetarë të Torontos, raporton Radio-Canada, janë mbledhur mbrëmë në një përshpirtje të organizuar në sheshin Mel-Lastman, North-York, në afërsi të vendit ku ndodhi sulmi mizor me furgon, si pasojë e të cilit humbën jetën 10 persona.

Kryeministri Kanadez, Justin Trudeau, Guvernatorja e Përgjithshme, Julie Payette, Kryeministri i Québec-ut, Philippe Couillard, mbërritën gjithashtu dje në Toronto ku u bashkuan me Kryeministren e Ontarios, Kathleen Wynne, dhe Kryetarin e Bashkisë John Tory, për të dëgjuar liderët komunitarë dhe fetarë të cilët organizuan homazhin në respekt të kujtimit të viktimave.

Më parë gjatë ditës, kryeministrat Wynne dhe Couillard, i prinë marshimit të solidaritetit të mijëra njerëzve që vërshuan në rrugën Yonge.

“Duhet të tregojmë që rruga është e jona, që lagja është e jona. Duhet tu dëshmojmë familjeve të viktimave që ato nuk janë vetëm në dhimbjen e tyre, që plagët do ti shërojmë sëbashku”, deklaroi një qytetare që jeton fare pranë vendit të ngjarjes tragjike të të henës së kaluar.

Kryeministrja Ontariene, e ka cilësuar manifestimin si një “shprehje e qartë e vullnetit të shoqerisë për të mbështetur familjet, të mbijetuarit, shërbimin policor dhe atë të ndihmës së shpejtë, dhe të gjithë ata që ishin dëshmitarë të ngjarjes. Homologu i saj nga provinca frankofone deklaroi se kish ardhur të sillte mesazhin e miqësisë dhe soladaritetit me qytetarët e Torontos. Julie Payette, Justin Trudeau dhe John Tory gjithashtu morën pjesë në marshim dhe më pas shkuan drejt sheshit Mel-Lastman ku u zhvillua ceremonia e homazhit.

Evenimenti përkujtimor u organizua nga Bashkia dhe dy grupet komunitare Faith in the City dhe Toronto Interfaith Council. Gjatë përshpirtjes, folën 7 persona nga grupe të ndryshme të besimeve fetare, mes të cilëve disa rabinë, një imam dhe një murg budist. Morën pjesë gjithashtu 6 grupe kori dhe nje grup perkusionistësh.

Momenti më emocionues i mbrëmjes ishte kur Eva Goldfinger, një nga rabinët që morën fjalën, lexoi një nga një emrat e 10 viktimave fatkeqe që humbën jetën të hënën.

Lart nga e majta në të djathtë: Anne Marie D'Amico, Dorothy Sewell, Renuka Amarasingha, Munir Najjar, Chul Min (Eddie) Kang.

Poshtë nga e majta në të djathtë: Mary Elizabeth (Betty) Forsyth, Sohe Chung, Andrea Bradden, Geraldine Brady et Ji Hun Kim.  

@FlasShqip.ca

Photo Credit:

Reuters/Fred Thornhill

Radio-Canada/Philippe Leblanc/Philippe de Montigny