Grushti i shtetit i Mark Carney - Nga Mathieu Bock-Côté

E përmenda disa ditë më parë në një kronikë: Mark Carney ka fatin të ketë si fqinj politik Donald Trump, i cili jo vetëm ka një temperament autoritar, por edhe stilin që shkon me të, me një dimension karnavalesk, madje grotesk, një Cezar i kthyer në Neron, ose të paktën që bën gjithçka për të na e dhënë këtë përshtypje.

Kjo i mundëson Carney-t të luajë rolin e demokratit të madh, madje edhe të kampionit të demokracisë në botë. Dhe meqë jetojmë në një epokë ku propaganda e mbyt informacionin, janë të shumtë ata që e besojnë këtë, pa u interesuar shumë për faktet.

Megjithatë, nëse u referohemi fakteve, do vërejmë se, pas pamjes së tij prej xhentëlmeni britanik, Mark Carney është një drejtues autoritar si shumë të tjerë sot.

Karriera e tij e paralajmëronte këtë.

Globalizmi

Guvernator i bankave qendrore nga vokacioni, Mark Carney i përfaqëson mirë elitat globaliste që kanë dominuar Perëndimin që nga fundi i viteve 1980.

Këto elita nuk e mbështesnin legjitimitetin e tyre te sovraniteti popullor (madje kishin mosbesim ndaj popullit), por te një kompetencë e supozuar teknokratike, e vërtetuar nga diploma dhe nga një qark bashkëzgjedhjeje brenda institucioneve të qeverisjes globale.

Janë pikërisht këto elita, shumë më tepër sesa ato që vijnë nga jeta politike demokratike, që kanë ndërtuar Perëndimin që njohim sot, me shoqëri të zhytura në borxhe, të pasigurta, ku prona është e paarritshme për shtresat e mesme, të përmbytura nga emigracioni, me referenca identitare të çmontuara, të mbushura me argëtim banal që çon në mpirjen e masave.

Me fjalë të tjera, këto elita arrogante dhe moralizuese kanë dështuar.

Nga ky formim vjen Mark Carney. Dhe kështu mund të shpjegohet ardhja e tij në pushtet dhe vala e kërcimeve të deputetëve nga një kamp politik në tjetrin.

Partia Liberale e Kanadasë (PLC) është në pushtet që nga viti 2015. Qëllimi i saj, më shumë se kurrë, ishte të bëhej partia dominuese e qeverisjes në Kanada. Për ta realizuar këtë, ajo i ka kolonizuar të gjitha institucionet e vendit me besnikët e saj dhe ka ndryshuar përbërjen demografike të popullsisë në favorin e vet.

Autoritarizmi

Elitat kanadeze e kanë përhapur këtë diskurs. Partia Liberale arriti të ruajë pushtetin. Por pa shumicë parlamentare. Kanadezët refuzuan t’ia japin atë. Atëherë, Carney vendosi ta marrë shumicën duke vjedhur deputetë njeri pas tjetrit, çka ia doli ta bëjë.

Zyrtarisht, ai ka respektuar logjikën e institucioneve, por në realitet, bëhet fjalë për një grusht shteti të heshtur. Rezultati i zgjedhjeve shtrembërohet për t’i dhënë vetes pushtete të plota që populli ka refuzuar t’i japë.

Kanadaja nuk është më veçse një demokraci në dukje, ku më shumë preferohet të merremi me Donald Trump sesa të shohim ç’ndodh në shtëpinë tonë.

Ndërkohë që Liberalët pritej të riktheheshin në opozitë pas 10 vitesh keqqeverisjeje të Justin Trudeau, Mark Carney përfitoi nga rikthimi i Donald Trump dhe ia doli me ndihmën e propagandës të krijonte përshtypjen e gabuar se Kanadaja ishte e kërcënuar nga aneksimi, madje pothuajse nga pushtimi, dhe se vetëm ai mund ta shpëtonte, duke mbrojtur sovranitetin e saj.

Burimi: Journal de Montréal

Fotot: The Canadian Press; Sebastien Soriano/Figaro