Kush është avokati i kryeterroristit Milan Radoiçiç?

Gazeta Danas - Përktheu nga serbishtja Lis Bukuroca

Biografi personal i Mlladiçit që dënoi Klintonin, Blerin dhe Shrëderin: Kush është Goran Petronijeviç, mbrojtësi i Milan Radoiçiçit?

Edhe pse në Serbi nuk ka një avokat që Milan Radoiçiç nuk mund t’ia lejonte vetes, Goran Petronijeviç ishte padyshim zgjedhja më e natyrshme.

Biografia e tij profesionale dhe orientimi ideologjik e bëjnë atë përfaqësues ideal të nënkryetarit të fundit të Listës Serbe dhe të vetëshpallurit mbrojtës të serbëve në Veriun e Kosovës.

Petronijeviç ka lindur në vitin 1960 në Prokuplje, ndërsa fëmijërinë e ka kaluar në fshatin Gajtan të komunës së Medvegjës, ku prindërit e tij kanë punuar si mësues shkolle. Familja e tij u shpërngul në Beograd, ku ai u diplomua në Fakultetin Juridik.

Siç raportoi së fundmi gazeta Alo, ai u pranua në Lidhjen e Komunistëve në klasën e tretë të gjimnazit dhe ishte sekretar partie në universitet.

Pas studimeve, ai punoi si gjyqtar. Në karrierën e tij shtatëmbëdhjetëvjeçare, ai kishte disa ngjarje në biografinë e tij me të cilat pak gjyqtarë në botë mund të mburren. Kështu, për shembull, në maj të vitit 2000, ai shqiptoi një dënim prej 1632 vjet burg. Përkatësisht, Petronijeviç ishte kryetar i Dhomës së Madhe të Gjykatës së Qarkut në Pejë, e cila dënoi 143 shqiptarë të Kosovës për krimin e terrorizmit.

Në të njëjtën periudhë, Petronijeviç ishte anëtar i këshillit që dënoi me 20 vjet burg karriget bosh në të cilat duhej të uleshin Klinton, Ollbrajt, Shiraku, Shrëderi, Bleri, edhe atë për shkak të bombardimeve të RF të Jugosllavisë...

Rënia e Sllobodan Millosheviçit shënoi njëkohësisht fundin e karrierës së gjyqtarit dhe fillimin e karrierës së Goran Petronijeviçit si avokat. Ai ishte kreu i mbrojtjes së Radovan Karaxhiçit në Hagë dhe gjithashtu mbrojti Veselin Sljivançanin para Tribunalit. Në vend, ndër të tjera, ai përfaqësoi Radomir Markoviçin, ish-kryetar i RDB-së, artisten e estradës Svetlana Razhnatoviç, anëtarin e klanit Zemun Sasha Pejakoviç - Peleta...

Ai është nënkryetar i lëvizjes së krahut të djathtë Për Serbinë, dhe një biografi e shkurtër në uebsajtin e lëvizjes thotë se Petronijeviç është “biografi personal i Ratko Mlladiç” dhe “një ekspert i ngjarjeve në Srebrenicë”.

Anëtarët e kësaj lëvizjeje militojnë për “ringjalljen e vetëdijes kombëtare të kombit serb dhe forcimin e bashkëpunimit të gjithanshëm me të gjitha kombet sllave ortodokse dhe të gjitha kombet e Ballkanit, për afirmimin e së drejtës për bashkim të të gjitha pjesëve shtetformuese të kombit serb që mbetën jashtë kufijve të Serbisë, për zhdukjen e serbofobisë dhe urrejtjes ndëretnike.”

Siç ka shkruar së fundmi Radio Evropa e Lirë, Petronijeviç ishte një nga vëzhguesit e zgjedhjeve lokale të organizuara nga Rusia në pjesët e okupuara të Ukrainës.

Dhe megjithëse është rregullisht në media si përkthyes i situatave politike ligjore dhe ndërkombëtare, në maj 2020 ai u shfaq në një rol disi të ndryshuar. Në atë kohë, mediat shkruanin se Petronijeviç, së bashku me gjyqtarin në pension Novica Pekoviç, ishin viktima të një sulmi fizik nga një grup meshkujsh në një kafene të Beogradit.

Foto: Kurir