Letër nga Ferri shokut Edi Rama me rastin e mbylljes së Muzeut Kombëtar - Nga Dritan Goxhaj

 Dritan Goxhaj

“I dashur Edi,

Gjithnjë nëse na lejon të të quajmë i dashur, u gëzuam pa masë sapo morëm lajmin që një nga shërbëtorët e tu në luftën kundër patriotizmit shqiptar, një farë Blendi Gonxhe, besojmë dhe shpresojmë nën direktivën tuaj, nxori vendimin për të mbyllur Muzeun Kombëtar të Shqipërisë.

Duke marrë parasysh se kohët e fundit në shumë rrethe dhe në disa media aty te ju në Shqipëri është intensifikuar disi si shumë aktiviteti patriotik, dhe me qëllim që kjo luftë që ju dhe qeveria juaj keni nisur kundër këtij aktiviteti patriotik real të bëhet sa më drejt, pa gabime dhe më me sukses, e pamë të nevojshme që ne një grup antishqiptarësh të mbledhur këtu në Ferr për atë çfarë iu kemi bërë shqiptarëve t’ju   jepnim disa orientime.

Ky grup përbëhet nga: Vaso Çubrilloviç, Napoleon Zerva, Jorgo Zografi; Aleksandër Rankoviç, Mitropoliti Spiridon Vllehu,  Gjenerali Jorgo Çolakoglu, Joani Metaksas, Joanis Rallis, Nikolla Pashiç dhe Konstantinos Mitsotakis.

Lista i dashur Edi e atyre që duan të të falenderojnë për këtë vepër tënden është e gjatë, por ne vendosën vetëm të vëmë emrat e kryesisë të këtij grupi antishqiptar këtu.

Partisë Socialiste të Shqipërisë

Komitetit të saj Qëndror

Sekretarit të saj të parë shokut nr.1 Edi Rama

Nr. 666 prot.

Rrethi shtatë

Ferr më 09/03/2024

Patriotizmi është opiumi i popujve. Këtë të vërtetë të madhe duhet të bëjmë çmos që ta kuptojë çdo anëtarë i partisë tuaj dhe simpatizant i saj, edhe ata (dhe këta nuk janë pak) që janë të helmatisur e që duhet t’i çhelmatisim. Kjo nuk është një punë e lehtë, por as edhe e pamundur.

Këtë luftë të madhe nuk duhet t’ia lëmë spontanitetit e të kënaqeni duke thënë se brezat e rinj që do të vijnë do ta braktisin këtë opium, ose se ndjenja e patriotizmit ka mbetur vetëm të pleqtë e te disa të gënjyer. Kjo nuk është ekzakte, këta mund të humbasin virulencën e tyre, vetëm në rast se i luftojmë e i demaskojmë, kurse ringjallen, propagandohen e zgjerohen në rast se i nënvleftësojmë.

Patriotizmi i dashur Edi ka të bëjë me botëkuptimin dhe me ndërgjegjen dhe për të rrënjosur këtë lloj dogme të patriotizmit te shqiptarët kanë shërbyer organizimet e tyre luftarake në të shkuarën. Organizime për të cilat po punohet shumë fort që ato të çrrënjosen nga historia dhe kujtesa e tyre, e kështu edhe nga ndërgjegja. Luftën kundër patriotizmit nuk duhet ta drejtoni vetëm kundër pikpamjeve të tilla, por edhe kundër atyre zakoneve të përditshme idealiste dhe idealizmave të jo vetëm atyre që besojnë tek patriotizmi, por ndaj atyre që nuk besojnë, por që bëjnë veprime në favor të tij pa e ditur mirë se çfarë janë duke bërë, por thjesht për inerci të atyre që njohin.

Një punë të mirë e për t’u lavdëruar keni bërë ju, kur themi ju, d.m.th. qeveria juaj, por jo vetëm edhe ata para jush, por ti i dashur je kampion në mbylljen e shkollave shqipe në të gjitha minoritetet. Je kampion në lejimin që librat e historisë për minoritetet të vijnë nga vendet e tyre, pa kontroll nga shteti shqiptar e miratim paraprak të botimit të tyre.

Duke mos lënë asnjë shkollë të të gjitha niveleve në gjuhën shqipe në këto minoritete, iu ke hequr mundësinë edhe atyre që janë shqiptarë e që banojnë në këto zona minoritare të ndihen si shqiptarë në të ardhmen. Duke bërë në mënyrë të vazhdueshme çpopullimin e fshatit dhe të Shqipërisë, ti po jetëson në mënyrën më perfekte dhe moderne memorandumet tona të kahershme për këtë problem me shqiptarët.

Bota i dashur Edi po ecën përpara, dhe ndjenjat patriotike dhe nacionaliste nuk puqen me idenë e vajtjes në Europë. Ti me mundime të mëdha je duke ndërtuar marksizmin në Shqipëri, por nacionalizmi dhe patriotizmi nuk të lënë që ai të ndërtohet. Sepse patriotët kanë ideale dhe ti e di që idealistët janë të rrezikshëm, ndërsa marksistët si ti e të tjerët që ke mbledhur rreth vetes kanë vetëm qëllime e jo ideale. Ti e ke parë që patriotët nuk janë oportunistë si ti, ndërsa marksisti është gjithnjë oportunist. Mjafton të shohësh gjithë ish-profesorët e ata gjoja shkencëtarë të regjimeve të mëhershme se si janë bërë menjëherë me çdo regjim të ri, sepse ata dinë të adoptohen.

Iniciativa që ke marrë këto ditët e fundit për mbylljen e Muzeut Kombëtar është rruga më e mirë për të mos u lënë mundësi njerëzve dhe kryesisht brezave të rinj historikisht dhe materialisht të mësojnë ç’vuajtje, ç’mjerime, gjakderdhje e shtypje ka pësur populli shqiptar nga dora jonë.

Luftën kundër patriotizmit shqiptar ti e ke zhvilluar në mënyrat më të stërholluara. Çdo gjë për këtë çështje duhet t’ia përshtatësh vendit dhe zakoneve.

Duam të të falenderojmë për këtë inicitivë që ke marrë dhe shpresojmë e urojmë që ta vazhdosh edhe në të gjitha rrethet e Shqipërisë.

Shumë e stërholluar ishte edhe ajo gjoja ideja e atyre doktorëve të shkencave për të ndaluar të flitet për prejardhjen e shqiptarëve nëpër tv, as neve nuk na kish shkuar në mendje ajo se si të ndalojmë të flitet për historinë e Shqipërisë nga kushdo, por vetëm nga marksistët.

Duke pasur parasysh të gjitha sa thamë më lart ne si antishqiptarë të përbetuar të këshillojmë të jesh më realist dhe të bësh kujdes me ata patronazhistët, sepse midis tyre mund të këtë edhe nga ata që e mendojnë se patriotizmi është gjë e mirë. Me ta duhet punuar me ngadalë dhe duhen bindur që nuk përfitojnë asgjë nga të deklaruarit shqiptar. Megjithatë të këshillojmë që të kesh kujdes sepse mund të ketë elementë armiq, që mund ta përdorin këtë vendim tëndin kundër pushtetit tënd personal dhe atij të partisë tënde dhe qeverisë.

E rëndësishme është që kjo çështje të mos diskutohet në asnjë media e asnjë televizion. Të mos bëhët objekt bisedash nëpër programe televizive, pra të mos kthehet në një problem kapital. Çdo gjë për të çrrënjosur patriotizmin dhe dashurinë për shqiptarinë duhet të kalohet dhe të bëhet pa bujë, me durim, me konsekuencë, në rrugën që ju shpjeguam më lart.

Me respekt,

Kryesia e Antishqiptarizmit nga ferri”

© Dritan Goxhaj