Syrgjyn-vdekur, elegji për Luigj Gurakuqin - Fan Noli

 Fan Noli

Nëno moj, mbaj zi për vllanë,

Me tre plumba na i ranë,

Na e vran' e na e shanë,

Na i thanë tradhëtor.

 

Se të deshte dhe s'të deshnin,

Se të qante kur të qeshnin,

Se të veshte kur të çveshnin,

Nëno moj, të ra dëshmor.

 

Nëno moj, vajto, merr malin,

Larot t'a përmbysnë djalin

Që me Ismail Qemalin

Ngriti flamur trimëror.

 

Nëno moj, m'a qaj në Vlorë

Ku të dha liri, kurorë,

Shpirt i bardhë si dëborë;

Ti s'i dhe as varr për hor.

 

Nëno moj, ç'është përpjekur

Gojë-mjalt' e zëmër-hekur,

Syrgjyn-gjall' e syrgjyn-vdekur,

Ky Vigan Liberator.