Ontario vendos taksë shtesë mbi eksportet e energjisë elektrike në SHBA

Pas disa javësh kërcënime, kryeministri i Ontarios Doug Ford kalon në veprim: një taksë shtesë prej 25% do imponohet tani mbi të gjithë energjinë elektrike që provinca eksporton në Shtetet e Bashkuara. Ajo do të qëndrojë në fuqi "derisa tarifat doganore amerikane të eliminohen përfundimisht", thuhet në një deklaratë të qeverisë së provinces më të populluar kanadeze. Sipas rregullave të reja, çdo prodhues që shet energji elektrike në Shtetet e Bashkuara duhet të aplikojë një taksë shtesë prej 10 dollarësh për megavat-orë, që përfaqëson rreth 25% të kostos mesatare të energjisë. Provinca vlerëson se kjo taksë do të prekë 1.5 milionë familje dhe biznese në shtetet Miçigan, Minesota dhe Nju Jork. Për të zbatuar këtë masë, qeveria e Ontarios ka miratuar një rregullore të re që lejon një ndryshim urgjent në rregullat e tregut të Shoqatës së Pavarur për Menaxhimin e Rrjetit të Energjisë Elektrike (SIERE). Ministri i Energjisë gjithashtu i ka dërguar një letër udhëzuese SIERE-s.

Nga viti 2021 deri në 2024, Ontario ka eksportuar midis 12 dhe 14 TWh në vit në Shtetet e Bashkuara. Provinca vlerëson se kjo taksë shtesë mund t'u kushtojë amerikanëve deri në 400,000 dollarë në ditë. Edhe pse kjo shumë duket relativisht e vogël në kontekstin e një lufte tregtare që përfshin dhjetëra miliarda dollarë, Doug Ford këmbënguli se ajo ka një ndikim të rëndësishëm. "E patë bujën rreth alkoolit…. Kjo padyshim tërhoqi vëmendjen e tyre", deklaroi ai, duke iu referuar vendimit për të ndaluar shitjen e alkoolit amerikan nga LCBO. Sipas qeverisë, të ardhurat që Ontario do të mbledhë nga kjo takes e re do të arkëtohen fillimisht nga SIERE dhe më pas do të riinvestohen në masa mbështetëse për qytetarët.

Kryeministri gjithashtu sqaroi se rregullorja e re ofron mundësinë për të rritur taksën në çdo nivel dhe në çdo moment. "Për sa kohë që kërcënimi i tarifave nuk është zhdukur përfundimisht, Ontario nuk do të dorëzohet. Pezullimi i disa tarifave apo përjashtimet e minutës së fundit nuk do të jenë të mjaftueshme. Duhet t’i japim fund këtij kaosi njëherë e përgjithmonë," theksoi ai, duke përsëritur gjithashtu se është i gatshëm të ndalojë eksportet e energjisë elektrike në rast të një përshkallëzimi nga SHBA në betejën tregtare, por pa specifikuar se çfarë do të shkaktonte një përgjigje të tillë. "Le të shohim se si do të zhvillohen gjërat", përfundoi Doug Ford, duke theksuar se presidenti amerikan ndryshon mendje çdo ditë.

Përmes një emaili, Komisioni i Shërbimeve Publike të Miçigan deklaroi se taksa shtesë prej 25% mund të ketë një ndikim të caktuar në çmimet e tregjeve rajonale të energjisë, por ndikimi për klientët në Miçigan ka të ngjarë të jetë minimal. Komisioni theksoi se shqetësimi i tij kryesor është stabiliteti i rrjetit të energjisë elektrike që furnizon 15 shtete si dhe provincën e Manitobës. Sipas institucionit në fjalë, "çdo veprim që mund të kufizojë ose të prishë furnizimin me energji të rrjetit mund t’i bëjë këto shtete dhe Manitobën më të prekshme nga ndërprerjet e energjisë".

Ontario është aktualisht e vetmja provincë që po vendos një taksë shtesë mbi eksportet e saj të energjisë në Shtetet e Bashkuara. Sot (10.03) Doug Ford inkurajoi kryeministrat e tjerë të vendit të shqyrtojnë masa të ngjashme. Ai iu drejtua drejtpërdrejt homologes së tij nga Alberta, e cila vetë e ka përmendur eksportin e naftës së provincës së saj si një "as nën mëngë". "Mesazhi im për kryeministren Danielle Smith: Mendoj se ndoshta një ditë do t'ju duhet të përdorni atë as dhe të siguroni miratimin për një taksë eksporti. Nëse doni të flisni për asë? Ky do ta ndryshonte lojën menjëherë", deklaroi Doug Ford. Ai shtoi se një vendim i tillë është ekskluzivisht në dorën e kryeministres Danielle Smith.

Kryeministrja e Albertës u përgjigj pa asnjë mëdyshje. "Më lejoni të jem e qartë: Alberta kurrë nuk do ta pranojë një ide kaq absurde dhe vetëshkatërruese. Ky nuk është opsion", shkroi ajo në X.

© Flasshqip.ca me informacion nga Radio-Canada

Foto: The Canadian Press/Chris Young