Doug Ford po luan me zjarrin - Nga Marc-André Leclerc

Marc-André Leclerc

Që nga fillimi i betejës tarifore me Shtetet e Bashkuara, kryeministri i Ontarios, Doug Ford, ka mbajtur titullin "Kapiteni i Kanadasë".

Ford ka përfituar nga mungesa e lidershipit të qeverisë federale për të marrë iniciativën dhe për të treguar forcën e tij.

Disa javë më parë, ai i habiti të gjithë kur vuri mbi kokë një kapele me mbishkrimin "Canada is not for sale" para një takimi mes qeverisë federale dhe provincave.

Të hënën (10.03.), ai befasoi sërish duke vënë në zbatim kërcënimin e tij për të vendosur një taksë prej 25% mbi energjinë elektrike të shitur në SHBA. Reagimi i Donald Trump ishte i qartë dhe i prerë dhe z. Ford u detyrua të tërhiqej.

Koordinimi

Që nga zgjedhja e Mark Carney si lider i liberalëve dhe kryeministër i ardhshëm i Kanadasë, qeveria duket sërish e bllokuar, në një periudhë tranzicioni ku askush nuk duket se po drejton vendin.

Dominic LeBlanc është një nga të paktët që duket se po mban timonin, derisa kryeministri i ri të marrë detyrën. Sot, LeBlanc dhe Ford shkuan në Washington për t’u takuar me Howard Lutnick dhe për të diskutuar marrëveshjen e tregtisë së lirë.

Në këtë mënyrë, Doug Ford, ashtu si François Legault, mendon se rinegocimi i marrëveshjes së tregtisë së lirë është e vetmja mënyrë për t’u çliruar nga tarifat.

Megjithatë, në prag të fushatës zgjedhore, a është Kanadaja në një pozicion të fortë? Jo dhe aq.

Përshkallëzimi

Rreziku i lëvizjes së Doug Ford lidhur me energjinë elektrike është se ajo mund të çojë në një përshkallëzim të situatës.

Kur Ford flet për ndalimin e eksportit të energjisë elektrike, ekziston rreziku që SHBA të ndalojë furnizimin përmes linjës 5 që kalon nëpër Miçigan. Ky tubacion është jetik për furnizimin e lindjes së vendit me naftë dhe gaz.

Prandaj, Doug Ford duhet të jetë i kujdesshëm. Nëse dëshiron vërtet të jetë "Kapiteni i Kanadasë", ai duhet të flasë në emër të gjithë vendit dhe jo vetëm për Ontarion.

Burimi: Journal de Montréal

Foto: AFP; National