Protesta e Ottawa, Policia Federale mohon t’u ketë dhënë bankave listën e donatorëve

Sipas The Canadian Press, Policia Mbretërore Kanadeze (RCMP) ka deklaruar sot (21.02) se po bashkëpunon me institucionet financiare në lidhje me llogaritë bankare që janë ngrirë si rezultat i masave të jashtëzakonshme federale për t'i dhënë fund protestave në Ottawa dhe në pikat kufitare.

Dekretet e qeverisë bazuar në Aktin e Masave Urgjente, tani u lejojnë bankave dhe institucioneve financiare të ngrijnë llogaritë e personave të dyshuar për dërgim parash në ndihmë të protestuesve të "Freedom Convoy" që kampuan në qendër të Ottawa për tre javë.

Në deklaratën e saj, Policia Mbretërore Kanadeze sqaron që hetuesit u kanë transmetuar bankave vetëm identitetin e njerëzve që dyshohet se kanë vepruar si influencues gjatë protestave, si dhe identitetin e pronarëve ose drejtuesve të automjeteve që refuzuan të largoheshin nga qendra e kryeqytetit federal, duke siguruar njëkohësisht që në asnjë moment nuk u ka ofruar institucioneve financiare një listë donatorësh si dhe faktin që vendimi për ngrirjen e llogarive mbetet përgjegjësi e tyre.

Deklarata e policisë federale u bë publike pasi një numër deputetësh konservatorë shprehën sheqtësimin në emër të votuesve të tyre, të shqetësuar për llogaritë e tyre bankare që janë ngrirë, vetëm sepse kanë bërë një donacion relativisht të vogël për lëvizjen e protestës.

©Flasshqip.ca

Foto: Radio-Canada