Arbër Xhekaj debuton në National Hockey League me Canadiens Montréal

21 vjeçari Arbër Xhekaj, lojtari kanadez i hokejit nga Hamiltoni (vendlindja e tij) me baba shqiptar nga Kosova dhe nënë çeke, falë këmbënguljes së tij të jashtëzakonshme, më në fund e ka parë të realizuar sonte në mbrëmje (12.10.) ëndrrën e tij për të luajtur në NHL (National Hockey Ligue) qysh në ndeshjen e parë të sezonit 2022-2023. Ai debutoi si mbrojtës në radhët e Canadiens Montréal dhe luajti rreth 13 minuta në ndeshjen që u fitua nga ekipi i tij me rezultatin final 4-3, në përballje me Maple Leaf të Torontos.

Xhekaj e pat nënshkruar kontratën me Canadiens qysh vitin e kaluar, por nuk arriti të bëhet dot lojtar formacioni duke u kthyer sërish tek Hamilton Bulldogs, skuadër me të cilën fitoi kampionatin e Ligës së Ontarios. Xhekaj shkëlqeu aq shumë sa trajneri i tij Jay McKee e quajti edhe lojtarin me më shumë kontribut në fitoren e ekipit dhe me më shumë impakt në kampionat.

Performanca me Bulldogs e Xhekajt u bë shkak që drejtuesit e Canadiens ta thërrasin atë në turneun përgatitor këtë fillim vjeshte dhe më pas të konfirmojnë që ai do vazhdojë këtë vit në Montréal. Kjo ishte arsyeja që mediat frankofone i kushtuan shumë vëmendje ditët e fundit Arbër Xhekajt, veçanërisht Journal de Montréal, La Presse Montréal, por edhe Radio-Canada dhe La Presse Canadienne. “Arbër Xhekaj, nga Costco në NHL” (JM), “Xhekaj: Mbrojtësi me një ADN të veçantë” (JM), “Arbër Xhekaj ose vendosmëria e një kokëforti” (La Presse), “Arbër Xhekaj i gatshëm të tregojë aftësitë e tij” (Radio-Canada Sport) janë disa nga titujt e shkrimeve që i kushtohen atij.

Ja si e përshkruan djaloshin e fuqishëm dhe trupmadh në një nga kronikat e tij më 10 tetor 2022 tabloidi Journal de Montréal: “Arbër Xhekaj arriti sukses duke i bërë vend vetes tek Canadiens. Një histori këmbënguljeje e një lojtari që ka punuar dhe tek Costco për të përballuar jetesën në vitin 2020. Ajo që ka arritur Xhekaj nuk është diçka e zakonshme. Pasi u injorua nga të gjitha skuadrat e NHL në seancat e përzgjedhjes, ai nënshkroi një marrëveshje tre-vjeçare me Canadiens vitin e kaluar. Të hënën 10 tetor, ai mori konfirmimin që po fillonte sezonin e rregullt në Montréal. Një tjetër hap në udhëtimin e tij befasues”.  

Skeda e Arbër Xhekaj

• Numri i fanellës me Canadiens 72
• 21 vjeç, lindur më 31 janar 2001 në Hamilton.
• Gjatësia 193cm.
• Pesha 103 kg.
• Mbrojtës. Gjuan me të majtën.
• 2017-2018 St. Catharines Falcons
• 2018-2020 Kitchener Rangers
• 2021-2022 Hamilton Bulldogs
• 2022-2023 Canadiens Montréal

©Flasshqip.ca