Aktualitet

Flamuri i Kosovës valëvitet në Ottawa

Së shpejti në Ottawa një rrugë me emrin “Parasol Kosovo”, në nder të operacionit më të njëjtin emër kryer nga Qeveria Kanadeze në vitin 1999, që solli në Kanada rreth 7000 refugjatë nga Kosova gjatë luftës.

Sot në Ottawa, për të tretën herë radhazi është valëvitur flamuri i Kosovës. E veçanta e këtij viti, është së përveç festimeve të 11-vjetorit të Pavarësisë, përkujtohet dhe 20-vjetori i mbërritjes së refugjatëve të Kosovës në Kanada. Gjithashtu dhe 20-vjetori i ndërhyrjes së NATO-s ku Kanadaja ka qënë një ndër aktorët kryesorë, si dhe 10-vjetori i Marrëdhënieve Diplomatike Kanada-Kosovë.

Sipas njoftimit të Ambasadës së Republikës së Kosovës në Ottawa, në fjalën e tij, në prezencë të autoriteteve më të larta federale, lokale, trupit diplomatik, gazetarëve dhe komunitetit të diasporës, Ambasadori Lulzim Hiseni, theksoi raportet e shkëlqyera dhe të veçanta që gëzojnë Kanadaja dhe Kosova. “Viti që lamë pas, përveç vizitave tepër të rëndësishme nga autoritet Kosovare në Kanada ka kulmuar dhe me marrëveshjen FIPA (marrëveshja për mbrojtjen e investimeve të huaja) që i hap rrugën bizneseve Kanadeze që të investojnë në tregun Kosovar”-është shprehur Ambasador Hiseni.

Në kuadër të këtij aktiviteti tepër të rëndësishëm, nën-Kryetari i Bashkisë së Ottawa-s z.Matthew Luloff, përshëndeti përzemërisht Ambasadën e Kosovës si dhe komunitetin e diasporës shqiptare, të cilët japin një kontribut tepër të çmuar në Ottawa. Ai përgëzoi iniciativën e Ambasadës së Kosovës dhe komunitetit të diasporës për emërimin e një rruge në Kryeqytetin e Kanadasë me emrin “Parasol Kosovo” në nder të operacionit më të njëjtin emër kryer nga Qeveria Kanadeze në vitin 1999, që solli në Kanada rreth 7000 refugjatë nga Kosova gjatë luftës.

“Kanadaja dhe Kosova ndajnë vlera të përbashkëta dhe kjo i bën këto vende që të jenë mike”-u shpreh në fjalën e saj Kryetarja e Grupit të Miqësisë Parlamentare Kosovë-Kanada deputetja Anita Vandenbeld, e cila shprehu dhe urimet më të përzemërta në emër të Kryeministrit Kanadez Justin Trudeau. 
Drejtoresha për Europën Lindore dhe Azi pranë Ministrisë së Punëve të Jashtme Kanadeze vlerësoi lartë intesitetin e marrëdhënieve ndërmjet dy vendeve dhe shprehu gatishmërinë sidomos për bashkëpunim më të thelluar ekonomik dhe tregtar.