Java Kanadeze - Lajme shkurt 16 Janar 2022

 

Ura e Konfederatës - Prince Edward Island

Céline Dion anulon për shkaqe shëndetësore turneun në Amerikën e Veriut

Universiteti i British Columbia blen një libër të rrallë të Shekspirit

Saskatchewan, kamarier-robot për të evituar kontaktet në restorant

Montréal, kompania e transportit publik STM sërish deficitare

Prince Edward Island, mbyllet ura e Konfederatës për shkak të motit të keq

Pascal Siakam i jep fitoren Toronto Raptors kundër Bucks të Milwakee

 

Céline Dion anulon për shkaqe shëndetësore turneun në Amerikën e Veriut

Sipas një komunikate zyrtare të shpërndarë nga vetë këngëtarja e madhe në Twitter, pjesa e turneut botëror Courage që Céline Dion do të zhvillonte midis 9 Marsit dhe 22 Prillit 2022, në Kanada dhe Shtetet e Bashkuara është anuluar. Diva 53-vjeçare vuan aktualisht nga spazma të rënda dhe të vazhdueshme muskulare, që e pengojnë atë të performojë para publikut dhe rikuperimi i saj po zgjat më shumë sesa pritej, detajonte deklarata e publikuar dje në mëngjes (15.01.2022). Turneu Courage, që pat nisur më 18 Shtator 2019 në Quebec City, u pezullua dy herë në dy vitet e fundit për shkak të kufizimeve shëndetësore. Në program mbeteshin ende 19 koncerte në 16 qytete të Amerikës së Veriut, pa llogaritur datat e turneut evropian. Koncerti i fundit ishte planifikuar në Nyon, Zvicër, më 17 korrik 2023. Shfaqjet e anuluara në Kanada janë ato në Winnipeg 14 Mars, Saskatoon 17 Mars, Edmonton 20 dhe 21 Mars dhe Vancouver 28 dhe 29 Mars. “Unë shpresoja të isha gati për t'u rikthyer në koncerte tani, por konstatoj se duhet të jem më e duruar dhe të ndjek rekomandimet e mjekëve. Do të jem shumë e lumtur të ngjitem përsëri në skenë kur të më rikthehet shëndeti dhe kur pandeminë ta kemi lënë pas”, ka shkruar në Twitter këngëtarja e madhe. Gjthashtu, në deklaratën zyrtare konfirmohet që të gjithë blerësit e biletave do të marrin një email ku shpjegohen hapat që duhen ndjekur për rimbursimin e pagesës.

 

Universiteti i British Columbia blen një libër të rrallë të Shekspirit

Universiteti i British Columbia i ka shtuar një libër të rrallë fondit të bibliotekës, pikërisht First Folio, një botim i parë i veprave të Shekspirit, i vitin 1623. First Folio është një nga librat antikuar më të lakmuar në botë. Egzistojnë gjithsej vetëm 235 kopje, kryesisht në Angli dhe Shtetet e Bashkuara. Këto kopje rrallë ofrohen për shitje dhe deri tani kishte vetëm një të tillë në Kanada, në Universitetin e Torontos. Universiteti i British Columbia nuk e ka deklaruar shumën e saktë për blerjen e First Folio, por ka pranuar që çmimi ishte disa milionë dollarë. Kjo blerje u bë e mundur falë njëqind donatorëve dhe Departamentit të Trashëgimisë Kanadeze. Të publikuara 400 vjet më parë, First Folio janë relike të rralla të veprave të Shekspirit, pasi asnjë dorëshkrim i Bardit të Stratfordit nuk ka mbijetuar. Në këtë botim prej 900 faqesh, gjenden 36 nga 38 dramat e Shekspirit, 18 prej të cilave u botuan për herë të parë.

 

Saskatchewan, kamarier-robot për të evituar kontaktet në restorant

Kufizimet shëndetësore kanë vënë prej kohësh në vështirësi pronarët e restoranteve sidomos për mungesë fuqie punëtore dhe garantimin e kushteve të sigurisë për mospërhapjen e Covid-19. Aktualisht, në Saskatoon, pronari i restorantit “Yip Hong's Dim Sum” po përdor një robot për të përmirësuar sigurinë në ambientet e tij, si për stafin ashtu edhe për klientët. Roli i robotit Gina është t'u japë ndihmë kamarierëve me shërbimin ndaj klientëve. Pronari i restorantit, Sam Yang, e vendosi përdorimin e robotit për të kufizuar kontaktin mes njerëzve. Sapo porosia është gati, një punonjës i vendos enët në tabakanë e robotit dhe i kërkon që të shpërndajë vaktin në tryezën e caktuar. Robotë të tillë tashmë përdoren edhe në disa restorante në Vancouver dhe Toronto, madje kryeqendra e Ontarios është bërë i pari qytet kanadez me një restorant plotësisht të automatizuar.

 

Montréal, kompania e transportit publik STM sërish deficitare

Société de Transport de Montréal (STM), kompania e transportit publik të metropolit frankofon, aktualisht po përballet me një deficit prej 43 milionë dollarë dhe duhet të gjejë absolutisht burime të reja të ardhurash. Kështu ka argumentuar (i cituar nga Radio-Canada) drejtori i përgjithshëm i saj, Luc Tremblay, të premten (14.01.2022) përpara anëtarëve të Komisionit për Financat dhe Administratën të Bashkisë Montréal. Ndër masat e tjera që synojnë të realizojnë kursime, STM planifikon të mbajë në fuqi reduktimin e shërbimeve edhe në vitin 2022. Kjo do të thotë që autobusët dhe metroja do të funksionojnë në të njëjtën frekuencë si vitin e kaluar, pra më rrallë se përpara periudhës së COVID -19, që uli në mënyrë drastike trafikun e pasagjerëve. STM e ka llogaritur reduktimin e shërbimeve të saj 5% në metro dhe 3.5% në linjat e autobusëve. Operacionet e para të mëdha të mirëmbajtjes për vagonët e rinj të metrosë AZUR (prodhim i ALSTOM) janë shtyrë gjithashtu për një vit, një vendim i cili, pa rrezikuar sigurinë e përdoruesve, mund të çojë në probleme të besueshmërisë, ka pranuar Luc Tremblay. Pavarësisht këtyre masave, të cilat do t'i mundësojnë kësaj kompanie publike të kursejë respektivisht 25 milionë dollarë dhe 12 milionë dollarë, STM ende duhet të sigurojë 43 milionë dollarë për të balancuar buxhetin e saj për vitin 2022.

 

Prince Edward Island, mbyllet ura e Konfederatës për shkak të motit të keq

Në provincat e Atlantikut u parajajmërua përsëri një fundjavë dhe fillimjavë me stuhi dëbore, erëra të forta, rrugë të bllokuara dhe ndëprerje të energjisë elektrike. Në Prince Edward Island gjatë ditës së djeshme (15.01.2022) pati ndërprerje energjie në rreth 8000 banesa, ndërsa ura e Konfederatës, që lidh ishullin me kontinentin u mbyll qysh të premten në mbremje, ora 20:00, për shkak të erërave të forta, rreth 90km në orë. Po kështu, disa akse rrugore ishin thuajse të papërshkueshëm. Reshjet e dëborës pritet të shkojnë deri në 30-40 cm.

 

Pascal Siakam i jep fitoren Toronto Raptors kundër Bucks të Milwakee

Falë 30 pikëve të shënuara nga Pascal Siacam, edhe pse në dizavantazh me 15 pikë, Toronto Raptors ia ka dalë të kalojë në avantazh përballë Bucks të Milwakee dhe ta fitojë ndeshjen me rezultatin përfundimtar 103-96 dje në mbrëmje (15.01.2022). Nga ana e tij OG Anunoby ka realizuar 24 pikë. Kështu, me këtë fitore, fisha e Raptors në këtë sezon përballë kampionëve në fuqi të NBA shkon 3-0.

©Flasshqip me informacione nga Radio-Canada

Fotot: Radio-Canada