Gëk Mëk - Nga Artan Gjyzel Hasani

nuk habitem

kështu ka qenë gjithnjë

çështje terminologjie

diktatura dhe demokracia e njëjta halé janë

njëra prodhon heronj të rremë

tjetra idiotë të vërtetë

dhe për ta bërë të ndihet mirë

skllavit do t’i vënë emrin I Lirë…

paskëtaj të dyja palët do të mbetën të kënaqura

ata që gjithnjë kanë gjithçka

dhe ata që kurrë nuk dinë asgjë…

kështu ka qenë gjithnjë…

ndryshojnë vetëm nga mënyra se si të heqin qafe…

në mungesë të teknologjisë

e para të vret gjakftohtë me një plumb

e dyta e sofistikuara në fillim të deformon

aq shumë sa të urresh veten

dhe të duash bankat

dhe në fund të skllavëron me dëshirën tënde

duke mos të lënë zgjedhje tjetër veç borxhit…

gjithnjë kush ka më shumë bomba do të fitojë

dhe do të të diktojë verdiktin e Historisë së ndritshme

në gjyqin e Kohës ku dëshmitarët janë dele

e Vërteta gjithnjë do të akuzohet për dëshmi të rreme

në emër të Pleqve të së Keqes

do të vriten Fëmijët

dhe ata që do të mbeten gjallë

do t’i mësojnë ta vizatojnë të bukur

Peshoren e Drejtësisë

dhe sytë e saj të mbuluar

me atë Leckën e Neveritshme…

(nga vëllimi poetik “LIBIDO” 2024)

©artangjyzelhasani