Cirku i Cinikëve - Nga Artan Gjyzel Hasani

të gjithëve mund të na parashqevojë jeta
një ditë
dhe nuk është e thënë të jetë e Premte
as trembëdhjetë
do të humbasim familje dhe miq, mendje
do bëhemi njerëz në nevojë
kushedi në mëshirën e kujt do të mbetemi
hamendje e keqpërdorur nga goja në gojë
dhe me emrin tonë
kështu si unë sot
do të krijojnë fjalë të reja
nga keqardhja
dashuria
urrejtja
apo kot për zbavitje
do të na akuzojnë si të pazotë
do të na vrasin si njerëz
që të na ringjallin si personazhe
të legjendave urbane
dhe më pas në Cirkun e Cinikëve
do të na ftojnë në Shfaqjen e tyre të Madhe
në Gjyqin tonë të Fundit
dhe për bamirësi hibride
transoqeanike
do të na lënë të hyjmë pa biletë…
© artangjyzelhasani 2025