Vangjush Ziko: Duhet varg i ri

dua të shkruaj varg të ri

(më duket sikur

kam harruar alfabetin)

mendimet përzihen

si gruri me egjrën

duhet një sitë e hollë

një filtër për ta pastruar

tymnajën e mendimeve

bota kjo shtëpi

me dyer të shkallmuara

ku askush s've dot rregull

ligjet e shkruara me kaligrafi

s'duan t'i lexojnë analfabetët

nuk shkruaj dot

stilolapsi gris letrën

duhet pergamen i regjur

prej lëkure bualli

të shkruash çmenduritë

dhe zhgënjimet e jetës