Vizatova në dritare - Nga Vangjush Ziko

Drurët

me gishtat e mpirë eshtakë

numërojnë ditët

që nga ikja e zogjve,

Dritaret e pallateve

mbetën me sytë në horizont

duke pritur diellin t'i ngrohë,

Njerëzit ecin rrugës

me peshën e reve

dhe mendimeve të hirta

mbi supet e tyre të lodhura,

Vizatova në dritare

një karvan me pata

që kthehen,

një ëndërr të harruar

ngjyrë manushaqe,

nuk e di sa më besuan.