Kur qajnë sytë e tu – Nga Vangjush Ziko

Kur qajnë sytë e tu

troket vjeshta në shpirt,

qajnë dashuritë,

mëritë,

kapriçiot

(që qajnë kuturu),

dhimbjet që lotët gëlltitin.

 

Kur qajnë sytë e tu

mos i beso botës që sheh

(e ka veshur mjegulla),

qajnë ëndrrat

nën retë e tua vetulla.

 

Kur qajnë sytë e tu

mos i fshih

as mos i fshi

lere ta marrë vjeshtën era,

në qoftë se lotin

dimri ta ngriu

vjen të ta shkrijë pranvera.