Pres brohoritjen e gjetheve - Nga Vangjush Ziko

 Vangjush Ziko

 

Iku dimri

shkriu dëbora bashkë me akullin

dheu zbuluar mbeti

si foshnjë e porsalindur

me kordon akoma lidhur,

horizonti tund

djepin bosh të jetës,

era ka harruar ninananën e barit,

zogjtë këlthasin

(duan të pinë vesë),

një bletë me ëndrrën e mjaltit

doli te pragu i kosheres

çeljen e luleve të presë,

unë dal në ballkon

(skeptik si drurët e veshur me heshtje)

pres brohoritjen e gjetheve

të një pranvere me ethe.