Dy këngë, dy Valentinë! - Nga Vangjush Ziko

Vangjush Ziko - Toronto

 

KËNGA E BUZËVE

E di pse i dua

Unë buzkat e tua?

Se flasin nxituar:

-Të dua! Të dua!

I dua kur dridhen

E dot s’më qortojnë,

Veç buzët e mia

Inatçëm kërkojnë.

Kur duken të qeta

E leht’ fishkëllejnë,

Por dridhjen e tyre

Në çip dot s’e fshejnë.

E di pse i dua

Un’ buzkat e tua?

Se dridhen kur thonë:

-Të dua! Të dua!

1959

 

ALBUMI I TRËNDAFILIT

Këputa trëndafilin,

burbuqen me vesë të prillit

si buzët e tua të kuqe,

Për ty e këputa,

në buzë më puthe,

në buzë të putha.

U vyshk trëndafili në kupë

si buzët e tua të kuqe,

Të putha në buzë unë

me buzët me rrudha

dhe ti me buzët e tua

më vure në gjumë.

Çelin e çelin burbuqet

mëngjeseve të prillit,

Nga flaka e kujtimit skuqet

albumi i trëndafilit.

2009

©Vangjush Ziko