Rrumpallesque - Nga Artan Gjyzel Hasani
në Mëmëdhe gjërat janë në harmoni të plotë
me detin e bërë kos dhe me kaosin…
ish-komunistë nevrikë të shqetësuar për hallet e demokratëve
e këta me zell duke zgjidhur telashet e socialistëve të rremë
amerikanë të kalkuluar merren me zullumet e Shqipërisë koloniale,
ndërsa shqiptarë, trima të papunë, me problemet e Ukraines…
modernë emrat këta njerëz të rinj
në vënd të mbiemrave epitete
ëngjëjt arnojnë flatrat
por djalli mbetet i njëjti
edhe kur e quajmë dreq…
sipas tradites komshiu di ku na pikon çatia,
ndërsa ne fusim ujë nën rrogozin e tij
në ruletë ruse vazhdojmë të luajmë jetën
fajtor mbetet gjithnjë tjetri
dhe askush nuk përpiqet të ndreqë veten…
udhëtimi ynë i përjetshëm nga çmenduria
drejt idiotësisë
me shpresën e pavdekshme se dikur pranë nesh
do të ndalojë hapat ndonjë i mençur…
(nga vëllimi poetik “IDIOTICUS”, 2022)
©artangjyzelhasani