Dy poezi për vete - Nga Vangjush Ziko

STRIPTIZËM SHPIRTI

Striptizmi i shpirtit

s'është spektakël.

Zhvishet natyra

dhe vishet prapë

me gjethet që hodhi në baltë.

Zhvishet gjarpri,

lë lëkurën prapa,

vesh lëkurën e re.

Adamin dhe Evën

i zhveshi Zoti,

e mbuluan me gjeth

turpin biblik.

Zhvishet shpirti i Poetit

përpara letrës,

ta veshë Botën lakuriq.

 

HIRI I FRYMËZIMIT

Fshij syzet.

Nuk e fshij dot ekranin!

Digjen vargjet qirinj

para ikonave të frymëzimit.

Rimat u bien këmbanave

të harmonisë.

Ky hi i ergjendtë,

që s'e fshij dot,

është hiri i temjanit,

që u dogj

në Tempullin e Poezisë.

 

©Vangjush Ziko