Ëndrra të rënda - Nga Artan Gjyzel Hasani

kemi qenë pleq dikur, e mban mend?

shtatëmbëdhjetëvjeçarë seriozë

skllevër sovranë të halleve tona,

më gjumë të lehtë dhe ëndrra të rënda

neveritur nga jeta, me duart në xhepa

të heshtur dhe të zhytur në mendime

donim të ndërronim botën…

pastaj u rritëm…sa shpejt na rritën

na thinjën bukur dhe tani jemi fëmijë

në vend të botës, ndërrojmë mbathjet

urinues të pandreqshëm me dhëmbë të vënë

në nevojën e llahtarshme për vëmëndje

egoistë, kapriçiozë dhe të zhurmshëm

sa më shumë afron fundi i udhës

dhe kalendarët nuk kanë më rëndësi….

në lulishtet e varrezave rendim pas fluturave

që ndalojnë saktësisht në vendin që do të kemi

dhe xixëllonjat e qiparisave i lemë për herën tjetër

për të tjerë fëmijë

kur më s’do të jemi…

(nga vellimi poetik "IDIOTICUS", 2022)

© artangjyzelhasani