Non Grata - Nga Artan Gjyzel Hasani

vdekja është një fillim i mbarë…

me lopatë do të hedhin baltë mbi emrin tënd

me daltë do të heqin baltën që hodhën mbi ty

për herë të parë nuk të duhet të bësh asgjë

do e bëjnë të tjerët me shumë zell këtë punë

për mirë a për keq

ndërsa ti i çliruar përfundimisht nga parajsat e rreme

nga farisejtë dhe filistinët

do të jesh duke paraqitur kredencialet në ferr

i akullt

i ftohtë

më i fortë se kurrë në dobësinë tënde

i padëshirueshëm si një e vërtetë e hidhur

që s’ka zjarr që ta djegë…

do të presësh gjatë për këtë ditë

një jetë të tërë ndonjëherë

ndoshta s’të pranojnë as në ferr

e mbi dhè s’do të kesh vend varri

do t’iu ngelesh në dorë të shkretëve

ndaj më parë duhet të vdesësh

që ata të fillojnë nga puna

daltat dhe lopatat bashkë…

(nga “IDIOTICUS”, 2022)

©artangjyzelhasani