Blasfemi fëmijësh të rritur - Nga Artan Gjyzel Hasani

të dielave në mëngjes trokiste dera

ishin arixhofkat e përtej urës,

lajkataret bukuroshe me kanistra

që për tridhjetë lekë të shikonin fatin,

vijën e jetës ku përgjonte vdekja

dhe gjysmën tjetër të udhës…

unë kisha frikë nga ato,

por më shumë nga fati...

nuk doja ta dija

nuk doja ta shihja...

m’i mbyllje sytë me pëllëmbë, nënë,

dhe unë fëmijë që akoma s’njihte gërmat

në dorën tënde lexoja shkrimet e shenjta…

dhe kur ike lart...

lart…

atje lart…

e urreva Zotin...

e urreva aq shumë

sa e desha prapë…

©artangjyzelhasani