Krijimtari

Kam njohur… - Nga Artan Gjyzel Hasani

…njerëz me shpirtin rrëmujë

kantier ndërtimi par exellence

që kullën e Babelit nuk e ngritën dot kurrë…

kam njohur njerëz të mërzitshëm

si qielli blu kur e braktisin retë

ku çdo ditë shfaqen pashmangshmërisht të njëjtë

hëna, yjet dhe dielli

kjo trini e shenjtë poetike

për besimtarë që lëkunden lehtë…

kam njohur njerëz që me nderin talleshin

dhe veset e tyre çuditërisht iu jepnin nur

sa herë që i buzëqeshnin djallit

dema dhe demonë lëshonin

për toreadorë guximtarë të fatit...

kam njohur dhe njerëz me jetë shumë të qetë

aq të qetë sa dukej se nuk jetonin…

kam njohur dhe veten

jo të shndritshmen

por të vërtetën…

secili në udhë të vet e unë në timen

u humbëm sa herë u gjetëm

u plakëm duke fajësuar udhëkryqet që na takuan

dhe harruam kryqet që nuk i mbajtëm mbi shpinë

por në gjoks për të zbukuruar shëmtinë

aq sa mundëm…

(nga vellimi poetik "IDIOTICUS", 2022)

© artangjyzelhasani