Mesazhi gri i kësaj dite - Nga Vangjush Ziko

Qielli pahiti qytetin cep më cep.

Ndez cigaren.

Shkrepsja u shua mbi dëborë

si një buzëqeshje e drojtur.

Tymi shkroi në ajër

mesazhin gri të kësaj dite.

Gishtat eshtakë të drurëve

më numëruan ditët dhe javët

që kur i braktisën zogjtë

(siç numërojnë shtëpitë bosh

të ikurit).

Dritaret e pallateve

me vezullimet e akullta

më kumtuan hallet

dhe ëndrrën e lumturisë të harruar.

Vizatova mbi xham një diell,

një karvan me pata të egra që kthehen...

Nuk e di sa më besuan.

© Vangjush Ziko