Kjo ditë marsi - Nga Vangjush Ziko

Me fenerin e solsticit në dorë

kjo ditë fund dimri

zbon blozën e natës,

shkel ngadalë

mbi plagët e ngrira të dheut,

kërkon çelësin e artë

(nga vjeshta fshehur),

të hapë marsi

me atë çelës floriri

siparin e stinëve:

të zgjojë manushaqen

me aguliçen,

qershizën gjumashe,

hardhinë delikate,

kallirin e grurit të ri

(hambarin e bukës sonë

të përditshme),

të gjitha mbuluar

me çorgën e bardhë të dimrit,

kjo ditë e solsticit

të gjakut e shpirtit.

© Vangjush Ziko