Nuk ke pse lexon - Nga Artan Gjyzel Hasani

duke lexuar do të kuptosh që je

një injorant i vockël

ngjyrë bezhë

i pafuqishëm si një statujë dylli nën diell

i parëndësishëm si një dritare e mbyllur

me pamje nga muri

dhe të tjera gjëra të dëmshme si këto

të papranueshme për madhështinë tënde

mos lexo

ç’të duhen librat

kërkojnë mend, vullnet dhe vetmi

mos e vrit mendjen

je mirë me pasqyrat

dhe xhamat e zinj të vitrinave…

ata që lexuan u kërrusën para kohe

u rrudhën më keq se të lajthiturit që shkruajtën

dhe rrugëve i ke parë këta fatkeqë

në mungesë të dëgjuesve

në prani të tallësve

flasin me veten

si jehona me shpellën

por ti rri ashtu siç je

ji i lumtur

injorant i vockël ngjyrë bezhë

pak idiot

madhështor

dhe i bukur…

(nga “FATA MORGANA”, 2023)

©artangjyzelhasani