Zotër të pasvdekjes - Nga Artan Gjyzel Hasani

nëse Nënë është fjala e parë

Zot është lutja e fundit

shpresa e të pamundurit

e nesërmja e pashmangshme

e atyre që kujtuan se mundën…

në fatkeqësitë që kalove

dhe në çastet e tua të fundit në këtë botë

ti nuk kërkon ndihmë nga ata që njohe

por i drejtohesh veç Atij

të panjohurit të madh

që një jetë të tërë e mohove

që nuk besove kurrë që ishte atje lart

por e kërkove këtu poshtë mes çallmash e veladonësh

dhe kjo është madhështia e Tij

që dëshmon dobësinë tënde

për t’iu lutur dikujt që nuk e ke parë kurrë

që nuk ke besuar që ekziston

dikujt që nuk të ngjason

dikujt që nuk është prej mishi e gjaku

por është frymë dhe energji

dhe madhështia e Tij bëhet e jotja

vetëm kur ti nuk je më

larguar përgjithnjë

si një mallkim i bekuar…

(nga “FATA MORGANA”, 2023)

©artangjyzelhasani