Poezia… - Nga Artan Gjyzel Hasani

…është një vajzë e zhveshur

që ka humbur udhën në mendjen tënde

dhe duhet t’ia mbulosh trupin e brishtë

me vargjet e tua

derisa ti të mbetesh lakuriq

aq shumë

sa të mos kesh më frikë nga i ftohti…

dhe për të mos e lënë vetëm

duhet të shpikësh zogj pa këmbë

që kanë veç krahë

që jetojnë dhe vdesin në ajër

të lindur për fluturime kundër dëshirës

në pamundësinë e përjetshme

për të ecur mbi tokë

por mos harro t’u falësh edhe një qiell

qiellin tënd…

e vështirë kjo

e pamundur ndonjëherë këtu poshtë

ku gjërat janë më të thjeshta

dhe njerëz të ngutur mospërfillës

nga një krimb krijojnë lehtësisht

një flutur

që më pas do të japë shpirt

në garderobën tënde të boshatisur…

(nga "FATA MORGANA", 2023)

© artangjyzelhasani