Buletin Meteorologjik - Nga Vangjush Ziko

*   *   *

Pllakosi vapa,

siç pllakos mërzia,

palmat e shushatura,

as marrin frymë,

as shushurijnë,

vala e detit

mbi gjoksin tim psherëtin,

djersijnë mendimet,

kripa e tyre m’i zbardhi vetullat,

thinjët m’u nxinë,

pres bubullimën,

ta zgjojë këtë jetë memece,

që njeh vetëm heshtje.

*   *   *

Rrebeshi mbushi sheshin

diamantë det.

Në grusht

mblodha breshërin

dhe m’u tret.

Qau ky qiell

dertin e vet.

*   *   *

Tymon ylberi.

U shtrydhën retë,

u bënë trok,

u thanë.

Bubullima u platit

prapa maleve

tok me shpresën time

mjerane.

© Vangjush Ziko