Krishtlindje mërgimtari - Nga Vangjush Ziko

Christmas tree!

Bredh i rritur në liri.

Bredh i rritur në dhe të huaj,

në dhe hua.

Hua jeta,

hua dhe shpresa.

Hua e ardhmja që dua.

Të kam borxh

dhe s’më ke hua.

Borxh jetën Zotit ia kemi,

asaj shpelle të Betlehemit.

Asaj komete që ndrit qiejtë,

që bredhit tonë i dha jetë.

I shkundim borën e mërzisë

dhe çdo dhjetor atë stolisim,

tok me shqiponjën tonë,

i varim shpresën - hajmali

gjysmë të shkrirë,

gjysmë të ngrirë.

O Christmas tree,

Bredh i rritur për lumturi.

© Vangjush Ziko