Psalm - Nga Vangjush Ziko

S’kam qenë në mal të shenjtë,

as stërnip i davidit s’jam,

jam biri i shekullit

me plagë të hapura.

Psallt në tempullin tim,

tempull i thjeshtë

pa kolona mermeri,

pikturuar me vargje

dhe ikona poetësh,

kupola e tij

me frymëzim të plumbtë veshur,

si parzmore luftrash,

zbukuruar me vetëtima

rimash të prushta,

që ndizen dhe shuhen

dhe vishen me hi,

Zemra ime - këmbanë

(as bronx, as hekur).

Këndoj psalme për botën

dhe fatin tim

mbështjellë me mjegull.

Amin!

© Vangjush Ziko