Krijimtari

Mbijetuesit - Nga Artan Gjyzel Hasani

njeriu jeton edhe kur zemra e tij nuk rreh më

në radiografinë e dashurisë shfaqen hiroshimat

si hiri mbi oshëtimat

Kupidi jo gjithnjë mbante një hark me shigjetë

në të rrallë një sopatë a granatë

ndonjëherë edhe vetë bombën atomike

të amballazhuar bukur

aromatike si një lule mimoze…

jemi mbijetues të dashurive të mëdha

dhe pasioneve të forta

mbijetues zemrash të gjëra

dhe mendjesh të vogla

mbijetues të ethes sonë që vrau tjetrin

mbijetues të hijes së vetes

gjysëm Abelë

gjysëm Kainë

të çensuruar në biblën e jetës

predikues komodë të gjakut të ftohtë

arkivolë të turpshëm në varreza dinjitoze

zombies që nuk e gjetën dot rrugën

për të ardhur siç ishin

për të shkuar siç u bënë…

(nga “FATA MORGANA”, 2023)

©artangjyzelhasani