Njeriu me kryq - Nga Vangjush Ziko

1.

Kam një kryq

(nuk jam Krisht)

jam njeri me kryq në shpirt,

me faj dhe pa faj

veten mbi të kryqëzoj,

parfum dhe miro me vaj

nuk pranoj,

plagën e shpirtit,

sa herë ma gërvishtin,

mëshirë kërkoj si Krishti

për këdo.

2.

E di që në venat e mia

kam gjak të papastër,

lundrojnë në trup

mëkatet e mia,

falem si vrasësi

dhe vetëvrasësi,

zemra avokat

truri - gjykatës,

shpirti im burg

dhe unë

i mbyllur në të si murg

mëtoj të bëhem i pastër.

3.

U bëra engjëll një çast

dhe u skuqa,

vetja m'u duk lakuriq

me krahë të këputura,

as qiellit

as tokës s'i ngjis,

profet q'u braktis,

i tallur Don Kishot.

I hodha gunën e dhirtë shpirtit

që dimri i jetës s'e shpon dot,

me fytyrë të qetë martiri

botën dhe veten sfidoj.

© Vangjush Ziko