Përkujtohet në Halifaks 20-vjetori i mbërritjes së refugjatëve nga Kosova

Është përkujtuar dje në Halifax, Nova Scotia 20-vjetori i mbërritjes në Kanada të refugjatëve nga Kosova. Aktiviteti u organizua nga Muzeu Kanadez i Emigracionit Halifax, Ambasada e Republikës së Kosovës, përfaqësuar nga ambasadori Lulzim Hiseni, dhe artisti Zeqirja Rexhepi bashkë me familjen e tij, me pjesëmarrjen speciale të asambleistes së Nova Scotia-s, Lena Metlege Diab, Kryqit të Kuq Kanadez dhe plot bashkëatdhetarëve të ardhur nga provinca të tjera të Kanadasë.

Kujtojmë se në pranverën e vitit 1999, Kanadaja sponsorizoi 7 000 refugjatë shqiptarë nga Kosova si pjesë e evakuimit të emergjencës ndërkombëtare, organizuar nga Kombet e Bashkuara për mijëra shqiptarët e përzënë me forcë nga vendi i tyre, të cilëve fillimisht iu hapën portat e ndihmës nga Shqipëria dhe Maqedonia.

Sot në Kanada numërohen më shumë shqiptarë, të cilët kanë ndërtuar jetën dhe të ardhmen e tyre në vendin që nuk ua kurseu mbështetjen. Disa prej tyre sollën eksperiencat personale në aktivitet duke shprehur mirënjohjen dhe dashurinë për njerëzit që hapën shtëpitë e zemrat si dhe vendin që përkrahu në zhvillimin e mëtejshëm në jetë.

Ceremonia u karakterizua nga pjesë të ndryshme artistike, si pjesë koreografike të shoqëruara në orkestër nga artistë shqiptarë, tingujt e violinës dhe ekspozita e pikturave të Zeqirja Rexhepit. Diçka e veçantë ishte që valltarët ishin kanadezë përveç dy kryesorëve që interpretuan Shotën dhe Azem Galicën. 

Në fund të pranishmit patën mundësi të shijonin mantije speciale, të gatuara në shtëpi nga zonja Bedrije Rexhepi me përkushtim në shërbim të komunitetit dhe emrit të mirë të Kosovës e shqiptarit në Kanada.

Ambasadori i Republikës së Kosovës Z.Lulzim Hiseni i dorëzoi artistit Zeqirja Rexhepi "Certifikatën e Mirënjohjes" për kontributin e tij të vyer në promovimin e kulturës shqiptare në Kanada  dhe mbështetjen e vazhdueshme të tij ndaj aktiviteteve të ambasadës.

• 
• 
• 
• 
• 
• 
• 
• 
• 
• 
• 
• 
• 
• 
• 
•  

 ©FlasShqip.ca