“Kontrata” - Fabul nga Vangjush Saro

Qendra Tregtare në qytetin e madh,

me Kaprollin bëri një kontratë:

“Fjala është të punosh për ne, vëlla.

por dhe vetë të jetosh si një pasha:

S’do të gërricesh më në shkurr’e ferra

për të ngrënë një mëngjes të mjerë,

se do kesh plot… fruta, ëmbëlsira.

Do kënaqen duke parë dhe njerëzia.”

 

Na e mbyllën në kafaz Kaprollin.

Pak a shumë, parashikimi doli:

Orë e çast e vizitonin kureshtarë,

dhe ai… përtypej, hiqej zvarrë.

Shkoi një javë, dy, u mërzit shumë:

Tha i shkreti:

“S’e bëj dot këtë punë!”

Kështu, e grisi kontratën me vlerë

dhe iku tej në male, ku fryn erë…