Dy vizatime dimri - Nga Vangjush Ziko

Mesazhi Gri i kësaj Dite

Hiri i qiellit

pahit qytetin cep më cep,

drurët

shandanë të shuar që s'tymojnë,

ndez cigaren,

tymi shkruan në ajër

mesazhin gri të kësaj dite,

shkrepsja

një buzëqeshje

që u shua mbi dëborë.

 ***

Bisedë e Heshtur

Gishtat eshtakë të drurëve

më numëruan ditët dhe javët

që kur i braktisën zogjtë,

dritaret e pallateve

me vezullimet e akullta

më kumtuan hallet

që as në gjumë s'u ndahen ,

vizatova mbi xham një diell.

një karvan me pata që kthehen,

një ëndërr lumturie të harruar,

nuk e di sa më besuan.