Ëndrra e lirisë - Nga Vangjush Ziko

E ndiej në mish gjilpërën

(më qep kostum të ri),

e ndiej gërshërën tënde,

histori.

Më shqep e më qep

nga e para

lëkurën e argasur,

lëkurën nga erërat përtharë,

nga cingërimat plasur.

Dhëndër nuk bëhem dot prapë,

nuk bëhem as bos i pasur,

një palë xhinse mjaftojnë

dhe një këmishë e thjeshtë,

xhepat le të mungojnë,

vargjet i mbaj në zemër.

Kur njerëzit më takojnë,

u jap një varg të gjelbër,

u them po vjen pranvera,

zhvisheni rrobën e vjetër,

me gjilpërë ferrash

qep jeta kostum tjetër.

Ndiej që më dhemb në mish

gjilpëra e historisë.

Sa zor të vishesh dhëndërr

me ëndrrën e lirisë.

2015 - Vëllimi “MBASE NESËR GDHIN E DIEL”