Një ditë - Nga Vangjush Ziko

Do mbyll një ditë sytë e mi

e s’do t'i hapë as dashuria

(siç mbyllim shpesh një hajmali

ku fle e verbër lumturia),

ti qaj e qetë pa dënesë,

mos i fshih lotët me shami,

as mos i mbaj, leri

të bjenë porsi vesë

siç bie shiu në çdo maj

përmbi një lule që u tha

dhe veç aromën e saj la.

siç bie breshëri i marrë

përmbi një shkëmb që s’di të qajë

por në damarët të ngrirë mban

ëndrrën e zjarrtë për një vullkan,

do mbyll një ditë sytë e mi

tok me vullkanin dashuri

me zjarr’ e hirin e saj në gji.