Dhuratat e vjeshtës - Nga Vangjush Ziko

Vangjush Ziko - Toronto

Vjeshta

me kostumin lara-lara

qepur me gjembat e dëllinjës

më kujtoi karnavalet

dhe fëmininë që gënjehej

se jeta ka vetëm një stinë,

atë të buzëqeshjes.

Vjeshta

ma mbushi gotën

me mushtin e vreshtës,

mos ndiej vetminë,

as shi e as breshër,

as vetëtimat e dimrit

që fshehur thinjave rrinë.

Vjeshta

piktorja surrealiste

më vuri trëndafila të artë

në vazon e kristaltë

mbushur me lotë shiu

dhe lotë të kripur njeriu.

©Vangjush Ziko