Vdis Vdekjen - Nga Artan Gjyzel Hasani

Vra

Vrit

Vrau

Vranë

Vrit se të Vrau

Vdekje Vill...

Viktima e Vrasës

Vorbull Varresh Vajtojnë...

Victory...Victory

i Varrosëm të Vrarët

luft’ e re le t’fillojë...

ç’rëndësi paskan sistemet,

demokracitë e diktaturat, ideologjitë, filozofitë,

fetë dhe qytetërimet, të drejtat e njeriut dhe torturat

e dokrra të tjera si këto

për sa kohë që në drit’ të diellit

e njerëzimit më e vjetra lojë është lufta

e fëmijës arma më e dashura lodër….

nga gishtërinjtë tanë V-në rrëmbejnë patat e egra

për të vizatuar pafajesisht

fitoren e Vdekjes në prehërin e qiellit...

kur linde një revolver lodër të dhuruan

kukulla shënjestra jote e pare,

pastaj me rradhë nëna, motra…

në shkollë mësove se prindërit e tu ishin të pazotë

të mbron shteti të thanë…

se shteti është më i fortë…

dashuria është shpikje e humbarakëve

të lexuarit humbje kohe

drogë, seks dhe hip hop të rekomanduan

kukullën pa brekë të lirisë në vitrin’ të Kohës...

të njëzetat të gjetën duke luajtur videogames

ku njerëz kokërruar vrisnin njerëz me mjekër

një jetë të tërë nuk dashurove dot asgjë

kurrë s’të dhanë dashuri…

ndaj nuk munde kurrë të jepje…

kurrë nuk të folën për miqësinë

por se kush është armiku ta mësuan fort mirë…

të testuan nëse kishe mjaftueshëm urrejtje

të dhanë një lodër të vërtetë plot tym e zjarr

një armë dhe një armik

në avionët e mëdhenj të hypën

dhe larg…shumë larg të çuan

të gatshëm plot dëshirë

për të mbrojtur interesat e atdheut të tyre

në atdheun e një tjetri…

ka nevojë vërtet për një revolucion

pa barrikada, pa ideologë, pa teori konspiracioni

pa banka e bankierë, pa ushtri dhe drones

pa iluminati dhe globalizëm, pa sheikë dhe shejlokë

pa kapitale dhe marksizëm, pa napoleonë dhe leninë

pa stalinë dhe enverë,

çurçillër dhe hitlerë...

ka nevojë vërtet për një revolucion

pa gjak dhe pa armë…pa bibla e kuranë

por veç me një abetare që fillon te gërma D

dhe me Fjalën e Dashurisë në familjen tënde

në emër të fëmijës tend…

për të…

me të…

filloje që sonte me aq dije sa ke

dhe për të parën here lutju një Zoti

nje Zoti të ndryshëm…

një Zoti të pafe…

(nga vellimi poetik “PRANDAJ ...", 2014)

© artangjyzelhasani