Uniforma e mërzisë - Nga Vangjush Ziko

Me vjeshtën ikën ngjyrat,

e morën lejlekët ylberin

me sqepin e tyre,

më veshi grija,

uniforma e mërzisë,

trungjet e plepave

tyta pushkësh të vjetra turke

mbjellë nga luftrat ballkanike,

më kot qortoj vjeshtën,

cigare e pashuar hedhur përdhe

tymos dita ime,

digjet diçka në shpirt,

mendimet tymojnë:

dashuria,

miqësia

s'ndritin më,

shpatë e ndryshkur

që humbi këllëfin burrëria,

ushtarë të xhavitit jemi,

pushkën këmbejmë

me një kothere bukë.

©Vangjush Ziko