Dy poezi në kohë pandemie nga Flurans Ilia

PANDEMICA POETICA

Brenda mureve të lëkurës

hapen venat si llogoret e xhenjos

përllogaritjet inxhinierike

kundrejt armikut të padukshëm

Stinë të ngjyera në sfidë

ndalimkalimi

përpjekja për «distancim social»

empirizëm 2-metërsh

rropatje për të prekur gishtat e tu

Qendis thelbin e thukët

një katalog maskash

qëndisma të vockla buzësh

për një botë të madhe

sa vrima e një gjilpëre

 

ANIJA PREJ LETRE

Zëri yt pret përgjatë dimërimit

Mbledh brigjet e brinjëve

Pranverën e anijes prej letre

Bulbëzon ylli i mëngjesit lundrimit

Një albatros a tejqyrë prej kthetre?

Kërkon të rimarrë anijen e ritmit

Sythin e parë, hartën, stolisur

Me degë bajamesh e lule përbri

Rrugëtim i venave në oqean

Ku shtrirë je mbi një pentagram

Savanë e fjalëve ku qiellza reket

Flokënajë foljesh bora e parë

Zëri yt ëndërron brigjet

Anijen prej letre

Në qiellzë të ritmit zbatica rreshket

Albatros ëndrra a tejqyrë prej kthetre?

Në qindra fjalë qysh nga bora e parë

Në buzët e tua sythet çelen

Ëndërrtarë, ëndërrtarë, ëndërrtarë!

Mëshojini rremave se tirania e gjuhës

Urdhëron tendosje

Spiranca e ligjërimit po ngrihet

Lëvizja është zgjedhim në zhvendosje.

©Flurans Ilia